OJT, Part 7/12

<<<ANG NAKARAAN

May 1, 2011

7:09PM

"Akala ko di ka na pupunta..."

"Eh, wala lang... Sino-sino kayo?"

"Ayun, si Karl, si Gilbert, si Nico, tsaka si Anthony. Lika, pasok ka na..."

"Ako lang babae? Na naman? Ano ba yan..."

"He he!"

"Gusto mo i-text ko si Cecil, papuntahin ko dito."

"Gago ka ba? Gusto mong mag-World War III dito?"

"Ha ha!! World War III talaga?"

"Pasok ka na, kanina ka pa hinihintay ni Gilbert."

"Ngek!"

"Nagdadrama nga na naman yun eh."

"Palagi naman eh."

"Ikaw kasi, binasted mo."

"Hindi ko siya binasted no. Ano ba, akala ko ba naintindihan niya. Inexplain ko naman na sa kanya yung sitwasyon."

"Ano bang sitwasyon?"

"Na ayoko pang mag-boyfriend. Wala naman akong masasabi kay Gilbert, mabait naman siya, yun nga lang, di ba, hindi pa ito yung right time."

"Sige, sabi mo eh. Tara na, pasok na tayo. Lalamig na yung iced tea mo."

"Tss... lasing na ata yang si Gilbert eh... Maya na lang."

"Hindi yan... Ngapala, ba't ang saya-saya mo kagabi?"

"Wala, ayun... ni-like kasi ni Sir Max yung iba kong post..."

"So?"

"Wala, masaya... na binabasa niya pala di ba..."

"Anong gusto mong palabasin?"

"Wala."

"Anong wala? Besfren, gumising ka nga. Facebook lang yan. Hindi porket ni-like niya ang post mo, like ka na rin niya. Alamin mo naman kung kailan mo ihihiwalay ang realidad sa pantasya."

"Alam ko kung kailan naghihiwalay ang realidad sa pantasya Ginoong Roman. Hindi mo kailangang ipaalala sa kin."

"Eh ang O.A. mo na kasi eh. Lam mo yun? Para kang tanga..."

"Ewan ko sa yo..."

"Tuwang-tuwa ka naman pala na eh, bakit pumunta ka pa dito? Di dapat dun ka na lang sa inyo, tapos pinagla-like nyo mga post ng isa't-isa."

"Hindi siya online. Hindi ko na siya naabutang online kagabi. Hindi rin siya nag-online buong araw."

"Ah, kaya pala ganyan mukha mo ngayon... Ano lang ba ginawa mo maghapon?"

"Nag-computer. Nanood ng Royal Wedding. Naka-chat ko si Kuya Celso, sabi ko, yun, hindi ako makakapagsulat sa La ngayong sem, ayaw kasi akong pag-resignin eh. Nagsulat ng blog. Nagpalit ng profile picture. Nag-upload ng mga picture, ngayon ko lang na-upload yung nag-MOA tayo, tsaka..."

"?"

"Oo na, hinintay ko siyang mag-online."

"Alam mo, para ka nang tanga. Uulitin mo na naman ba yung ginawa mo..."

"Bakit ba? Eh sa masaya ako sa ginagawa ko eh. Wala na ba akong karapatang magkagusto sa isang tao?"

"Pero nagmumukha ka nang tanga. Ganyang-ganyan ka din dati kay..."

"Tss..."

"Wag kang makaiyak-iyak sa 'kin kapag..."

"Iba naman 'to, ok? Alam ko naman ang ginagawa ko. Enjoy lang.. Tsaka, naka-hide naman yung mga yun sa kanya, kaya di niya yun makikita, ok? Hindi kagaya nung kay..."

"Hmph!"

"Ano bang problema mo?"

"Wala."

"Eh bakit naggagaganyan ka?

"Wala. Nakakairita na kasi, puro ka na lang Sir Max. Sir Max dito, Sir Max ganyan. Alam mo yun? Wala ka na bang alam ikuwento kundi siya?"

"Ayaw mo na makinig sakin? Ayaw mo na akong kausap, ganun?"

"Hindi ganun, pero, paulit-ulit na lang eh, alam mo yun, nakakasawa na eh... Mabuti sana kung..."

"Kung ano?"

"Alam mo, tingnan mo, intern ka lang, boss mo siya, sa tingim mo ba magkakagusto siya sa 'yo? Pagkatapos ng OJT nyo, maghihiwalay kayo ng landas, magkikita pa ba kayo? Asa. After 1 year, sa tingin mo maaalala ka pa niya? Sa dami ng nago-OJT sa kanila? Sa huli, anong mapapala mo? Ngayon, kikilig-kiligin ka, next month, ano? Magda-drama drama ka, kasi di niya nire-replyan mga PM mo, hindi siya nag-oonline, hindi kino-commentan mga post mo sa wall niya. Pag may ibang taong makakita ng mga yun, anong sasabihin nila? 'Ano ba yang si Cha-Cha desperada, ano ba yang si Cha-Cha, malandi'. Puta, pag naririnig ko yung mga ganun... Naku!"

"..."

"Halika na, pasok na tayo sa loob, malamok na dito..."

"Hindi na, uwi na ko."

"Pota naman oh, kakarating mo lang eh."

"Mabuti pa sila Gina, matinong kausap..."

"So, hindi pala ako matinong kausap? Sige, magsama-sama kayo nila Gina, nila Cecil, mga..."

"Hindi mo kasi naiintindihan, ok? Palibhasa di ka pa nagkakagusto..."

"Ako? Hindi pa nagkakagusto?! Ha! Kung alam mo lang..."

"Alam mo, hindi mo naman kailangang magsalita eh. Makinig ka lang. Yun lang. Yun lang naman ang kailangan ko eh, yung may makikinig sa mga sinasabi ko, kahit kababawan lang, kahit kalokohan lang. Hindi yung, 'Ah si Charmaigne yan, may importante yang sasabihin, makinig kayo'. Alam mo yun? Simple lang naman di ba?"

"Nakikinig naman ako eh. Pero siyempre, bestfriend mo ko. Sinasabi ko lang naman yung totoo. Yung logical truth!"

"Sinasabi mo lang yung kailangan kong marinig. Pero hindi mo sinasabi, yung gusto kong marinig!"

"Ano bang gusto mong marinig?"

"Ewan ko sa 'yo! Uuwi na ko."

"Hatid na kita sa sakayan."

"Wag na! Mag-inuman na lang kayo d'yan. Leche!"

May 2, 2011

7:52AM

"Hello, Charmaigne."

"Ser?"

"Bakit single pa si Thor hanggang ngayon?"

"Po?"

"Kasi, Thor-pe siya."

"Ha?"

"Torpe... si Thor.. Thor pe. Got it? Didn't?"

"Ah.. ok. Luma na yan Sir eh."

"Oh, it's not funny? Cause I thought it was hilarious, kay Ralph nanggaling yung joke na yun."

"Corny na kasi kapag ilang beses nang narinig."

"Oh, I see... Well, I came in and saw you not smiling like the usual, so, I thought why not crack a little joke just to..."

"^__^"

"There. You're smiling. Better. See? I risked my credibility by that stupid joke, but it was all worth it because you smiled."

"Ha ha. Salamat..."

"Your welcome.

Guys, listen: From now on, may bago akong rule dito sa station natin. Bawal. Ang. Naka. Simangot. Smile everyone, its a good day!

See you later, Charmaigne."

                             "Aba, parang good mood si Sir ngayon ah..."

      "I know, right? Ngayon ko na lang nakita ganyan yan ever since.."

        "Ay, naku, di n'yo pa ba alam ang chika?"

                "Share!"

        "Nagkabalikan na sila ni Ma'am Lalaine."

                          "Weh?"

        "Oo, sure ako d'yan. Kausap niya sa cellphone kanina, sa lobby, sa baba."

          "Stir..."

                              "Talaga...?"

ANG KASUNOD>>>